അദ്ദിക്ർ

ഉഹ്ദ് യുദ്ധത്തില്‍ മലക്കുകളെ ഇറക്കി സഹായിക്കുമെന്ന് അല്ലാഹു വാഗ്ദത്തം ചെയ്തിട്ടുണ്ടെന്ന് പറഞ്ഞ് യുദ്ധത്തില്‍ പങ്കെടുപ്പിച്ച് ദാരുണമാം വിധം വധിക്കപ്പെട്ടത് നബിയുടെ വഞ്ചനയാണെന്ന് കപടവിശ്വാസികള്‍ ആരോപിച്ചതിനുള്ള മറുപടിയാണ് ഇത്. സ്വര്‍ഗം അല്ലെങ്കില്‍ നരകം അവരവര്‍ (ഓരോ ആത്മാവും) സമ്പാദിക്കുന്നതാണെന്ന് ഈ സൂക്തവും പഠിപ്പിക്കുന്നു. കളവും വഞ്ചനയും നടത്തുന്നത് ഏതൊരുവനാണെങ്കിലും വിധിദിവസം അവര്‍ അവരുടെ തൊണ്ടിസാധനങ്ങളും കൊണ്ട് ഹാജരാക്കപ്പെടുന്നതാണ്. വിധിദിവസത്തെ നിഷേധിക്കുന്ന അവര്‍ക്കെതിരെ 17: 13-14, 36; 24: 24; 36: 65; 41: 19-22; 99: 1-5 സൂക്തങ്ങളില്‍ വിവരിച്ച പ്രകാരം അവരുടെ തൊലികളും കേള്‍വികളും കാഴ്ചയും അവരുടെ പിരടിയില്‍ ബന്ധിച്ചിട്ടുള്ള കര്‍മരേഖയും ഭൂമി തന്നെയും സാക്ഷ്യം വഹിക്കുന്നതുമാണ്. 2: 168-169, 286; 3: 21-22, 30, 154; 9: 51 വിശദീകരണം നോക്കുക.